گوجرانوالہ(عدیل بھٹی) سماجی شخصیت عبدالقدوس بھٹی نے کہا ہے کہ کشمیر پاکستان کیلئے زندگی اور موت کا مسئلہ ہے ، پاکستان ہمارا گھر ہے اس کی حفاظت ہم سب پر فرض ہے ، کشمیر پاکستان کی شہ رگ ہے ، اس کو دشمن کے پنجہ سے چھڑانا ہم سب کی ذمہ داری ہے ، اقوام متحدہ اپنی قرار دادوں کے مطابق کشمیریوں کے حق خود ارادیت کو یقینی بنائے ،مرضی سے جینے کا حق ہر انسان کو حاصل ہے جہاں بھی یہ حق چھینا جائے ، پوری دنیا کو اس کے خلاف کھڑا ہونا چاہیے۔ 
 ان خیالات کا اظہار انہوں نے سلسلہ نیوز سے گفتگو کرتے ہوئے کیا۔ انہوں نے کہا کہ مظلوم کشمیریوں سے اظہار یکجہتی کے لئے پوری قوم سڑکوں پر ہے ،کشمیر پاکستان کی شہ رگ ہے ہمارے دل کشمیریوں کیساتھ دھڑکتے ہیں،کشمیر کی آزادی کی گھڑی آ گئی ہے ۔
انہوں نے کہا بھارتی وزیراعظم ہٹ دھرمی چھوڑ کر نوشتہ دیوار پڑھ لے کہ اب وہ زیادہ دیر تک مظلوم کشمیریوں کو ظلم وستم اور جبر سے دبا نہیں سکتا،بھارت کی ہٹ دھرمی خطے کے امن کے لئے بھی خطرہ بن چکی ہے ۔وقت آ گیا ہے کہ عالمی برادری بھارتی درندوں کے نہتے کشمیریوں پر مظالم رکوانے میں اپنا کردار ادا کرے ۔