شکرگڑھ(مانیٹرنگ ڈیسک) شکرگڑھ شہر میں مٹی اور گسّوں سے بھری ٹریکٹر ٹرالیاں بغیر ترپال کے سڑکوں پر دندناتی پھر رہی ہیں، جس کے باعث گرد و غبار اڑنے سے شہری شدید مشکلات کا شکار ہیں۔ سڑکوں پر مٹی بکھرنے سے نہ صرف فضائی آلودگی میں اضافہ ہو رہا ہے بلکہ حادثات کا خطرہ بھی بڑھ گیا ہے۔ شہریوں کا کہنا ہے کہ ٹریکٹر ٹرالی مالکان مٹی کی ٹرالیاں ڈھانپنے کی زحمت نہیں کرتے جس سے پورا علاقہ گرد و غبار کی لپیٹ میں آ جاتا ہے۔ خاص طور پر موٹر سائیکل سوار، طلبہ اور بزرگ افراد کو شدید پریشانی کا سامنا ہے۔ شکرگڑھ کے شہریوں نے ڈپٹی کمشنر نارووال اور ڈی پی او نارووال سے مطالبہ کیا ہے کہ ٹریکٹر ٹرالی مالکان کو سختی سے پابند کیا جائے کہ وہ مٹی اور گھسّوں کی ٹرالیاں ترپال سے ڈھانپ کر لے جائیں تاکہ گرد و غبار اور آلودگی پر قابو پایا جا سکے۔ شہریوں نے ڈی پی او نارووال سے یہ مطالبہ بھی کیا ہے کہ ٹریفک پولیس کے ذریعے ان ٹریکٹر ٹرالیوں کے خلاف قانونی کارروائی کی جائے۔ شہریوں کا کہنا ہے کہ زیادہ تر ٹریکٹر ٹرالیوں کے پیچھے نہ لائٹس لگی ہوتی ہیں اور نہ ہی ریفلیکٹرز، جس کے باعث رات کے وقت اور دھند میں یہ ٹرالیاں حادثات کا سبب بن رہی ہیں۔ شہریوں نے مطالبہ کیا ہے کہ ٹریکٹر ٹرالیوں کی بیک سائیڈ پر لائٹس یا کم از کم ریفلیکٹرز لگانا لازمی قرار دیا جائے تاکہ قیمتی انسانی جانوں کو محفوظ بنایا جا سکے۔ عوامی سماجی حلقوں نے متعلقہ اداروں سے فوری نوٹس لینے اور مؤثر کارروائی کا مطالبہ کیا ہے۔