شکرگڑھ (صہیب حسن صدیقی) چک امرو شکرگڑھ سے لاہور جانے والی اے سی ٹائم بس پجھنا سٹاپ کے قریب ایک افسوسناک حادثے کا شکار ہو گئی۔ عینی شاہدین کے مطابق بس ڈرائیور نے اچانک سامنے آنے والے رکشے کو بچانے کی کوشش کی، جس کے باعث بس بے قابو ہو کر الٹ گئی۔ حادثے کے فوراً بعد بس میں آگ بھڑک اٹھی جس نے چند ہی لمحوں میں پوری بس کو اپنی لپیٹ میں لے لیا۔ مسافروں نے چھلانگیں لگا کر جان بچائی۔ آگ لگنے سے بس مکمل طور پر جل کر راکھ ہو گئی۔ واقعے میں بس میں سوار ایک خاتون سمیت چار مسافر زخمی ہو گئے جنہیں فوری طور پر قریبی ھسپتال منتقل کر دیا گیا۔ اطلاع ملتے ہی ریسکیو ٹیمیں اور مقامی افراد موقع پر پہنچ گئے اور امدادی کارروائیاں شروع کر دیں۔ واقعے کی تحقیقات جاری ہیں جبکہ خوش قسمتی سے کوئی جانی نقصان کی اطلاع موصول نہیں ہوئی۔